సేంద్రియ ఆక్వా సాగుకు ఎంపెడా సమాయత్తం

చేపలు, రొయ్యలు సాగులో సేంద్రియ పద్దతులను ప్రోత్సహించడానికి సముద్ర ఉత్పత్తుల ఎగుమతి అభివృద్ధి సంస్ధ సమాయత్తమవుతున్నది. సేంద్రియ ఆక్వా సాగులో ఖర్చు పెరుగుతుంది. కాబట్టి సాధారణంగా ఆక్వా రైతులు వెనుకడుగు వేస్తుంటారు. అయితే , సేంద్రియ ఆక్వా ఉత్పత్తులకు 15 శాతం అధిక ధర చెల్లించి కొనుగోలు చేయడానికి విదేశీ సంస్ధలు ముందుకొస్తున్నందున ఇక మీదట ఆ ఇబ్బంది ఉండబోదని ఎంపెడా చైర్మన్ ఎ. జయతిలక్ అంటున్నారు. స్విట్జర్లాండ్ కు చెందిన అతిపెద్ద వినియోగదారుల సహకార సంస్ధ  ‘కూప్ కో – ఆపరేటివ్ ‘ కు అత్యంత నాణ్యమైన సేంద్రియ ఆక్వాసాగు,అంతర్జాతీయ సేంద్రియ ఆక్వా సర్టిఫికేషన్ పద్దతులు తదితర అంశాల్లో పాతికేళ్ల అనుభవం ఉంది. గోవాలో ఇటీవల జరిగిన అంతర్జాతీయ సీపుడ్ షో – 2018 లో కూప్ కో – ఆపరేటివ్ తో ‘ ఎంపెడా’ అవగాహన కుదుర్చుకుంది.దేశీయంగా ఆక్వా సంస్ధలు , రైతులతో సేంద్రియ ఆక్వా సాగు చేయించడంతో పాటు 15% అదనపు ధరకు కొనుగోలు చేయడానికి కూప్ కో – ఆపరేటివ్ అంగీకరించిందని ఎంపెడా చైర్మన్ తెలిపారు. సేంద్రియ సాగుకు సీడ్ ను అందించేందుకు హేచరీ ,మేత తయారీ కర్మాగారం, సేంద్రియ సాగు పద్ధతులపై సాంకేతిక సహకారం, శిక్షణ,దేశ ,విదేశీ మార్కెట్లు కోసం సర్టిక్షేషన్, ఒప్పంద కొనుగోళ్లు... వీటన్నింటిలోనూ ఆ సంస్ధ తోడ్పాటును అందించనుంది. వియాత్నాంలో సేంద్రియ ఆక్వా సాగును ప్రోత్సహిస్తున్న కూప్ కో – ఆపరేటివ్ ... దిగుమతి చేసుకున్నఆక్వా ఉత్పత్తులను స్విట్జర్లాండ్లో తన 2,200 అవుట్ లెట్ల ద్వారావిక్రయిస్తోంది.
Source : sakshi